Nënshkruhet Memorandum bashkëpunimi në mes Kosovës dhe Maqedonisë në fushën e standardizimit

Në Hotel 'Victory', në Prishtinë, u nënshkruan Memorandumi i mirëkuptimit ndërmjet Agjencisë së Kosovës për Standardizim (AKS) dhe Institutit të Maqedonisë për Standardizim (ISRM).

Dy organizmat homologë ishin dakorduar më herët që të ngritin bashkëpunimin në nivel më të lartë duke e finalizuar me një Marrëveshje të tillë. Kjo u realizua pikërisht në Ditën Botërore të Standardeve, kur standardizuesit anekënd globit festojnë.

Nënshkrimi i këtij Memorandumi ishte realizuar me rastin e vizitës së delegacionit të lartë maqedon, që kryesohej ministri i Ekonomisë së Maqedonisë, Valon Saraçini, ndërsa të pranishëm në këtë celebrim ishin edhe homologët kosovarë, zëvendëskryeministrja dhe ministrja e MTI-së ,Mimoza Kusari Lila, si dhe ministri i MZHE-së, Besim Beqaj.

Presidenti i Këshillit Profesional të ISRM, Dr.primarius, Kiro Salvani kishte përfaqësuar standardizimin maqedon në këtë akt celebrimi, ndërsa për AKS kishte firmosur kryeshefi i Agjencisë Hafiz Gara.

Memorandumi i mirëkuptimin është një dokument i formës së hapur, në të cilin mund të lidhen shumë marrëveshje teknike për të zgjeruar bashkëpunimin në fusha specifike të standardizimit.

AKS-ja më herët kishte realizuar një memorandum mirëkuptimi dhe marrëveshje bashkëpunimi me Drejtorinë e Përgjithshme të Standardizimit (DPS) në Tiranë.